Жайықта жаңа әліпби насихатталды

Насихат тобы 2018 жылғы 5-6 қарашада Атырау қаласының Халел Досмұхамедов атындағы Атырау мемлекеттік университетінде, Құрманғазы атындағы мәдениет сарайында және Исатай, Құрманғазы аудандарында, 8-9 қараша күндері Батыс Қазақстан облысы Орал қаласының Жәңгір хан атындағы Батыс Қазақстан аграралық-техникалық университетінде, Ақжайық, Сырым аудандарының тұрғындарымен кездесті.

Қорқыт ата атындағы Қызылорда мемлекеттік университетінің қауымдастырылған профессоры, филология ғылымдарының кандидаты Аман Абасилов, Қазақстан Республикасы Президенті жанындағы Мемлекеттік басқару Академиясының Батыс Қазақстан облысы филиалы директорының орынбасары Болат Жексенғалиев, Қ.Жұбанов атындағы Қызылорда мемлекеттік университетінің доценті, филология ғылымдарының кандидаты Нұрбол Сәдуақас, Шайсұлтан Шаяхметов атындағы «Тіл-Қазына» ұлттық-ғылыми практикалық орталығы Терминология және ономастика бөлімінің жетекші ғылыми қызметкері, филология ғылымдарының кандидаты Бақыткүл Ысқақова, аталған мекеменің терминология және ономастика бөлімінің кіші ғылыми қызметкері Салауат Кәрімовтен құралған топ мүшелері әліпбиге қатысты көпшілік көкейінде жүрген мәселелерді талқылады.

Топ мүшелері көпшілік қауымға жаңа қазақ әліпби емле ережелерінің мазмұны мен құрылымын таныстырып, қазақ әліпбиін латын графикасына көшіру кезінде туындайтын өзгерістер туралы әңгімеледі. Халықтың жаңа әліпби реформасына қатысты ой-пікірлерін тыңдады.

Аталған шараға облыс қалалары мен аудандарының тұрғындары, еңбеккерлері, зиялы қауым өкілдері, білім, мәдениет, денсаулық сақтау және халыққа қызмет көрсету салаларының қызметшілері, мемлекеттік қызметкерлер, студенттер мен оқушылар, өңірдің тілтанушы ғалымдары мен БАҚ өкілдері қатысты.